Muneer Saifi
itne pur-maghz hain dala.el kya
dil ko kar loge apne qaa.el kya
phir vahi sar hai aur vahi tesha
ishq kya ishq ke masa.il kya
raushni raushni pukarte ho
raushni ke nahin masa.il kya
roz maidan-e-jang banta huun
mujh men abad hain qaba.il kya
kis qadar arziyan guzari hain
kabhi dekhi hai meri file kya
haath phailana koi kam to nahin
peT dikhla.e tum ko saa.il kya
baiThe ab kirchiyan sameTte ho
apne raste men ḳhud the haa.el kya
rat-bhar jagte rahe hain daraḳht
koi panchhi hua hai ghayal kya
bat-be-bat hans rahe ho ‘munir’
yuun asar gham ka hoga zaa.il kya
Leave a Reply