Makhdoom Mohiuddin
sahar se raat ki sargoshiyan bahar ki baat
jahan men aam hui chashm-e-intizar ki baat
dilon ki tishnagi jitni dilon ka gham jitna
usi qadar hai zamane men husn-e-yar ki baat
jahan bhi baiThe hain jis ja bhi raat mai pi hai
unhi ki ankhon ke qisse unhi ke pyaar ki baat
chaman ki aankh bhar aa.i kali ka dil dhaḌka
labon pe aa.i hai jab bhi kisi qarar ki baat
ye zard zard ujale ye raat raat ka dard
yahi to rah ga.i ab jan-e-be-qarar ki baat
tamam umr chali hai tamam umr chale
ilahi ḳhatm na ho yar-e-gham-gusar ki baat
Leave a Reply