aaj tum tak pahunch kar
tumhari ankhon ke ainon men jhank kar
khud ko tatola
to malum hua ki
mera jism to tum tak aate aate
kahin biich raste men gum ho gaya tha
mera dil!!
kisi aur siine men daba diya gaya tha
mire hont
surkhiyon ki tahon ke niche
pade pade siyah ho chuke the
meri khushbu
jo main tumhare liye la rahi thi
kisi pichhle jhonke ne
apne jism men taank li thi
mera khvab
apni raat ki kokh men
ghalati se kisi aur ke liye
subh ka pahla harf rakh chuka tha
mere qalam ki raushnai ko
lafz ka ek samundar pi chuka tha
aur meri ankhon ki putliyon men nachti raushni ki
kisi sarab se dosti ho chuki thi
aur ab vo shayad isi ke saath bah rahi hai
so ab tumhari ankhon ke ainon men
main nahin
sirf ek saae ka iztirab
dolta nazar aa raha hai