Jameel Malik
kaun hamara dard baTa.e kaun hamara thame haat
un ke nagar men jagmag-jagmag apne des men raat hi raat
niile niile ambar par vo chand vo kirnon ki barsat
ham donon kho.e kho.e se haa.e vo mast-manohar ghaat
tu gulshan gulshan iThla.e main sahra sahra bhaTkun
dil ka ye sauda hai varna tera aur mera kya saat
sab duniya-dari ki baten dil men aur zaban par aur
tujh se pyaar baḌha kar aḳhir jaan ga.e teri auqat
chahe ab is ko apnao chahe naaz se Thukrao
aaj se apna daḳhl nahin hai dil ki Dor tumhare haat
duniya ka mansha hai pyare ham ghuT ghuT kar mar jaa.en
dil ki dhaḌkan ye kahti hai ik din badlenge halat
ek anokhi lai se main ne sab ke dil pighla.e hain
duniya ko ye vahm ki mere honTon par hai apni baat
Leave a Reply