poet

Khilaya Partaw-E-Rukhsar Ne Kya Gul Samundar Mein

khilaya partav-e-rukhsar ne kya gul samundar men

hubab aa kar bane har samt se bulbul samundar men

hamare ah-o-nala se zamana hai tah-o-bala

kabhi hai shor sahra men kabhi hai ghul samundar men

kisi din mujh ko le Dubega hijr-e-yar ka sadma

charagh-e-hasti-e-mauhum hoga gul samundar men

na chhedo mujh ko main ghavvas huun dariya-e-maani ka

na DhunDo mujh ko mustaghraq huun main bilkul samundar men

tumhen dariya-e-khubi kah diya gharq-e-nadamat huun

kahan ye naz-o-ghamza ariz-o-kakul samundar men

pada tha aks-e-ru-e-naznin arsa hua us ko

par ab tak tairta phirta hai shakl-e-gul samundar men

uthi mauj-e-saba jumban se shakh-e-ashiyan paiham

chali jaati hai goya kashti-e-bulbul samundar men

vo pain baagh men phirte hain main fikron men Duuba huun

tamasha hai ki gul gulshan men hai bulbul samundar men

abhi to sair ko jaana lab-e-dariya vo sikhe hain

abhi to dekhiye khilte hain kya kya gul samundar men

khayal-e-yar kyun-kar aa gaya tufan-e-girya men

khuda maalum kis shai ka banaya pul samundar men

kabhi girya ka tufan hai kabhi hairat ka sannata

kabhi bilkul huun sahra men kabhi bilkul samundar men

vo zalim ashiq-azari ki ‘parvin’ mashq karta hai

dikha kar bulbulon ko Dalta hai gul samundar men

More Poems

Leave a Comment