kar-e-vahshat men bhi majbur hai insan ab tak
haath apna hai aur apna hi gareban ab tak
dhajjiyan mere gareban ki uḌi phirti hain
gunjta hai mire na.aron se bayaban ab tak
kab se main kunj-e-gham-e-dil men chhupa baiTha huun
yaad karti hai mujhe shorish-e-dauran ab tak
mere hisse men bhi hai daulat-e-bedari-e-shab
ik ḳhalish si hai mata-e-gham-e-pinhan ab tak
but-kada TuuT ke ka.abe ki bana Daal gaya
dil jo ujḌa to hai ik umr se viran ab tak
tu guzargah-e-tamanna men tha ik partv-e-mah
main andheron men bhaTakta huun hirasan ab tak
tu vo suraj tha ki mausam ki na thi tujh ko ḳhabar
main huun andhi men charagh-e-tah-e-daman ab tak
mere ehsas ki garmi mire dil ki barsat
sab ruten hain tiri ankhon se numayan ab tak
ek surat thi jo ankhon men liye phirta huun
ek vahshat thi jo rakhti hai pareshan ab tak
chand yaden hain miri ziist ka hasil ‘baqar’
inhin yadon ke sahare huun ghazal-ḳhvan ab tak
Leave a Reply