Bada Khushnuma Ye Maqam Hai Nai Zindagi Ki Talash Kar

Afroz Alam

bada khushnuma ye maqam hai nai zindagi ki talash kar

tu na apne zehn ki baat kar nai dosti ki talash kar

tire asman ka sar kabhi kisi aur zamin pe jhuk gaya

ye hua to aisa hua hi kyuun kabhi us kami ki talash kar

kabhi khvahishon ke hujum men jo phisal gae hain mire qadam

jise pi ke dahr sambhal gaya usi mai-kashi ki talash kar

jo bahar ko bhi aziiz thi vahi shaam lutf-o-surur ki

jise siskiyon ki nazar lagi usi zindagi ki talash kar

jahan aadmi ki baqa rahe jahan fikr-o-fan ko jila mile

jahan dard-e-nau ka pata mile vahan agahi ki talash kar

na udaas shaam ke falsafe na bahar-e-sub.h ki raunaqen

na asl ziist ke zer-o-bam na to naghmagi ki talash kar

jo bhi guftugu ka usuul hai usi baat ka tu khayal rakh

nai kaenat ki justuju nai raushni ki talash kar