Mitti Mein Mila De Ki Juda Ho Nahin Sakta

mitti men mila de ki juda ho nahin sakta

ab is se ziyada main tira ho nahin sakta

dahliz pe rakh di hain kisi shakhs ne ankhen

raushan kabhi itna to diya ho nahin sakta

bas tu miri avaz se avaz mila de

phir dekh ki is shahr men kya ho nahin sakta

ai maut mujhe tu ne musibat se nikala

sayyad samajhta tha riha ho nahin sakta

is khak-e-badan ko kabhi pahuncha de vahan bhi

kya itna karam bad-e-saba ho nahin sakta

peshani ko sajde bhi ata kar mire maula

ankhon se to ye qarz ada ho nahin sakta

darbar men jaana mira dushvar bahut hai

jo shakhs qalandar ho gada ho nahin sakta

Leave a Comment