ham aj-kal hain nama-navisi ki taav par
din-bhar kabutaron ko bhagate hain baav par
rindon ko ek rose to dariya-dili dikha
kashti-e-mai ko chhod de saaqi bahao par
likkhun vo sher-e-ariz-e-rangin ki vasf-bin
takhta chaman ka sadqe hon kaghaz ki naav par
kuchh hajat-e-kabab nahin kaif-e-ishq men
sikhen dil-o-jigar ki lagin hain alaav par
be-minnat-e-jahan-e-tunuk-zarf agar mile
vallah phir to charb hai khasha pulav par
qaane ki munh se ne.mat-e-duniya khafif hai
bhari hai paav naan par miri naan paav par
afat-nishan hain dida-e-fattan ki putliyan
tashhir samri ko karenge ye gaav par
bazicha-gah-e-ishq men vo huun qimar-baz
donon jahan rakh diye hain ek daav par
kyuun kar baratiyon se na ghunghat kare dulhan
saari sabha miti hai tumhare banav par
gul-gasht ki havas chamanistan ki aarzu
ai be-qarariyo mire dil ko lagav par
karta huun main jo marham-e-kafur ki talash
karti hai chandni miri siine ke ghaav par
kashti-e-mai lagi rahi saaqi labon ke ghaat
ham mai-kashon ka qafila hai chal-chalav par
main jal men aa gaya vo na aaya fareb men
main zad pe chadh gaya vo na thera lagav par
parvane ki tarah na bujha de charagh-e-husn
tuti-e-khat ke atish-e-rukh se jalao par
ilm-e-safina us ko tujhe ilm-e-sina ‘bahr’
tu pul par aur shaikh hai kaghaz ki naav par
Leave a Reply