Sufi
hairan nahin hain ham ki pareshan nahin hain ham
is par bhi shaki-e-gham-e-dauran nahin hain ham
shikva zaban pe laaen vo insan nahin hain ham
tere sitam-ba-khair pareshan nahin hain ham
khaak apni khak-e-kucha-e-janan men ja mili
ehsanmand-e-gor-e-ghariban nahin hain ham
ankhon men ashk daagh jigar men labon pe aah
sab kuchh hai paas be-sar-o-saman nahin hain ham
gulha-e-ashk-e-khun se hai daman bhara hua
kis ne kaha ki khuld-ba-daman nahin hain ham
ham se gurez ham se ye be-eatinaiyan
ai dost bul-havas ka to arman nahin hain ham
hasrat jo aa gai vo nikal hi nahin saki
va ho sake jo ‘abr’ vo zindan nahin hain ham
Leave a Reply