Hamari Jab Hamari Ab Hamari Kab Se Kya Matlab

Nooh Narvi

hamari jab hamari ab hamari kab se kya matlab

gharaz un ko gharaz se kya gharaz matlab se kya matlab

aziz-o-aqriba par be-sabab vo zulm Dhata hai

ḳhata-var-e-mohabbat to hamin hain sab se kya matlab

agar ham jaan dete hain to un ke husn-e-surat par

hamen bartav se andaz se ya Dhab se kya matlab

ḳhuda ka naam bhi lete hue main hichkichata huun

vo puchhenge tumhara na.ara-e-yarab se kya matlab

vafa.en kijiye pichhli jafa.en bhuul ja.engi

agar matlab hai to ab se hamen hai jab se kya matlab

alag aana alag jaana alag rahna alag phirna

rah-e-ulfat men sab ko ham se ham ko sab se kya matlab

jo mazmun-e-ḳhat-e-pur-shauq mera vo nahin paḌhta

ye matlab hai ki mujh ko ma.ani-o-matlab se kya matlab

agar main puchhta huun aap mere ghar kab a.enge

to vo kahte hain a.enge magar is kab se kya matlab

na maz.hab hai na mashrab hai koi ham bada-ḳhvaron ka

hamen mashrab se kya nisbat hamen maz.hab se kya matlab

amir-e-ḳhud-gharaz hi ko gharaz matlab se matlab hai

faqir-e-be-gharaz ko hai gharaz matlab se kya matlab

zamana gharq-e-bahr-e-gham jo hota hai to hone do

tum apni ḳhair mango ‘nuh’ tum ko sab se kya matlab