mire muqaddar men jo likha tha nasib se vo pahunch na paaya
gira to tha asman se kuchh khajur men rah gaya aTak kar
musibat aa to ga.i thi lekin hui vo aap ulTe paanv ruḳhsat
laga jo tha zindagi ka kanTa nikal gaya chaar din khaTak kar
vahan hain ab ham ki kya bata.en vo pech-o-ḳham hain ki kuchh na puchho
ye chaal rah-e-talab ki dekho ki chal rahi hai maTak maTak kar
ye kaisi vahshat-asar ḳhabar hai pata to ai baghban lagana
khaḌe hue kaan kyuun gulon ke kali ne kya kah diya chaTak kar
kiya jo Dar Dar ke arz-e-matlab to mujh se ye kah diya unhon ne
sabaq nahin yaad abhi ye tum ko suna rahe ho aTak aTak kar
ḳhud apna rasta sudhar ‘natiq’ na fikr kar shaiḳh-o-barahman ki
vahin to jaate hain raste sab koi kahan ja.ega bhaTak kar
Leave a Reply