Wahshat Raza Ali Kalkatvi
jaan us ki adaon par nikalti hi rahegi
ye chheḌ jo chalti hai so chalti hi rahegi
zalim ki to aadat hai satata hi rahega
apni bhi tabi.at hai bahalti hi rahegi
dil rashk-e-adu se hai sipand-e-sar-e-atish
ye sham.a tiri bazm men jalti hi rahegi
ghamza tira dhoka yunhi deta hi rahega
talvar tire kuche men chalti hi rahegi
ik aan men vo kuchh hain to ik aan men kuchh hain
karvaT miri taqdir badalti hi rahegi
andaz men shoḳhi men shararat men haya men
vaan ek na ik baat nikalti hi rahegi
‘vahshat’ ko raha uns jo yuun fann-e-suḳhan se
ye shaḳh-e-hunar phulti-phalti hi rahegi
Leave a Reply