Jaan Uski Adaon Par Nikalti Hi Rahegi

jaan us kī adāoñ par nikaltī hī rahegī

ye chheḌ jo chaltī hai so chaltī hī rahegī

zālim kī to aadat hai satātā hī rahegā

apnī bhī tabī.at hai bahaltī hī rahegī

dil rashk-e-adū se hai sipand-e-sar-e-ātish

ye sham.a tirī bazm meñ jaltī hī rahegī

ġhamza tirā dhokā yūñhī detā hī rahegā

talvār tire kūche meñ chaltī hī rahegī

ik aan meñ vo kuchh haiñ to ik aan meñ kuchh haiñ

karvaT mirī taqdīr badaltī hī rahegī

andāz meñ shoḳhī meñ sharārat meñ hayā meñ

vaañ ek na ik baat nikaltī hī rahegī

‘vahshat’ ko rahā uns jo yuuñ fann-e-suḳhan se

ye shāḳh-e-hunar phūltī-phaltī hī rahegī

Leave a Comment