Hamidi Kashmiri
shaam se zoron pe tufan hai bahut
us ke lauT aane ka imkan hai bahut
aa.egi nur-e-mujassam ban kar
surat-e-saya gurezan hai bahut
kuchh bhi hon mauj o hava ke tevar
jism parvarda-e-tufan hai bahut
shayad aa pahunche hain vo asp-savar
shahr ka shahr hirasan hai bahut
jism o jaan varta-e-zulmat hi sahi
paikar-e-harf daraḳhshan hai bahut
zer-e-farman rahe iqlim-e-suḳhan
rahne ko gosha-e-viran hai bahut
Leave a Reply