aal-e-ahmad-suroor

Tu Payambar Sahi Ye Moajiza Kafi To Nahin

tu payambar sahi ye moajiza kaafi to nahin

shairi ziist ke zakhmon ki talafi to nahin

saya-e-gul men zara der jo sustae hain

saya-e-dar se ye vaada-khilafi to nahin

apni duniya se mili fursat-e-yak-jast hamen

asman ke liye ik jast hi kaafi to nahin

kisi chadhte hue suraj ki parastish na karo

dekh lo is men koi shoabada-bafi to nahin

tishnagi ham ko mili tum hue sairab to kya

in muqaddar ki sazaon se muafi to nahin

dev-mala ka dhundlaka ho ki khvabon ki kiran

aaj ki aina-sazi ki munafi to nahin

khvab takrao haqiqat se ki shoale niklen

is andhere men diya ek hi kaafi to nahin

More Poems

Leave a Comment