vo ik nazar se mujhe be-asas kar dega
mire yaqin ko mera qayas kar dega
main jab bhi us ki udasi se uub jaungi
to yuun hansega ki mujh ko udaas kar dega
mila ke mujh se nigahen vo meri nazron ke
zara si der men khali gilass kar dega
phir is tarah se rahega mire khayalon men
ki meri pyaas ko dariya ki pyaas kar dega
main us ki gard hatate hue bhi darti huun
vo aina hai mujhe khud-shanas kar dega
main us ke samne uryan lagungi duniya ko
vo mere jism ko mera libas kar dega
vo mahtab-sifat sirf raushni hi nahin
mujhi ko raat ka manzar bhi khaas kar dega
Leave a Reply