abbas-tabish

Paron Mein Sham Dhalti Hai

kahan jaana tha mujh ko

kis nagar ki khaak balon men sajana thi

mujhe kin tahniyon se dhuup chunna thi

kahan khema lagana tha

miri mitti rah-e-sayyargan ki ham-qadam nikli

miri palkon pe taare jhilmilate hain

badan men aag jalti hai

magar paanv men khun-asham raste ladkhadate hain

ye kya shiraza-bandi hai

ye meri be-pari kis kunj se ho kar baham nikli

nazar men din nikalta hai

paron men shaam Dhalti hai

magar main to lahu ki munjamid sil huun

badan ki kisht-e-viran men

ye kis ki ungliyon ne umr bhar mujh ko kureda hai

kahan shiryan men chalta hua ye qafila thahra

ki main us haath ki rekhaon men rang-e-hina thahra

kahan jaana tha mujh ko

kis jagah khema lagana tha

More Poems

Leave a Comment