Shahzad Ahmad
dil o nazar pe tire ba.ad kya nahin guzra
tujhe guman ki koi hadsa nahin guzra
vahan vahan bhi mujhe le gaya hai shauq-e-safar
kabhi jahan se koi qafila nahin guzra
agarche tu bhi nahin ab dilon ki duniya men
magar yahan koi tere siva nahin guzra
ham ab to us ko bhi ik hadsa samajhte hain
ḳhayal tha ki koi hadsa nahin guzra
kabhi kabhi nazar aa.i umiid bhi ‘shahzad’
hamara vaqt kabhi ek sa nahin guzra
Leave a Reply