Ye Nisabon Mein Likhi Aur Likhai Na Gai

ye nisabon men likhi aur likha.i na ga.i

zindagi ham ko kitabon men paḌha.i na ga.i

ek-tarfa bhi nibhate hain nibhane vaale

tujh se do-tarfa mohabbat bhi nibha.i na ga.i

yuun mira hafiza kamzor bahut hai mujh se

ek laḌki hai jo dilli ki bhula.i na ga.i

us ke chehre pe numayan hain mire hijr ke daagh

allah rakhe use kaise sar-e-a.ina ga.i

jism ki pyaas kisi taur bujha lete hain

ruuh ki pyaas magar ham se bujha.i na ga.i

bhuuk ugne lagi gandum ki jagah kheton men

hakim-e-vaqt tiri harza-sara.i na ga.i

naqsha-e-dahr men do mulk hain aise jin men

muddaton ba.ad bhi sarhad ki laḌa.i na ga.i

banu-e-shahar-e-suḳhan ‘mir’ ka boya kaaTa

tere ‘hashim’ se na.i fasl ugaa.i na ga.i