abdul-wahab-sukhan

Nae Uslub Mein Zinda Hue Hain

nae uslub men zinda hue hain

tabhi to harf-e-ainda hue hain

tulu-e-sub.h ki ummid kam thi

dua-e-shab se tabinda hue hain

na kaam aaya jahan arz-e-hunar bhi

lab-e-iz.har sharminda hue hain

badan men jiite ji jo mar gae the

vo apni ruuh men zinda hue hain

hamari shoalagi sab se juda hai

bujhe hain ham to sozinda hue hain

mita sakta nahin jin ko zamana

kuchh aise naqsh-e-painda hue hain

hamen sud-o-ziyan se kya ‘sukhan’ ham

na yabinda na girinda hue hain

More Poems

Leave a Comment