vo miri raah dekhti hogi
phir use niind aa ga.i hogi
tum se to ishq bhi nahin hota
tum se kya ḳhaak sha.iri hogi
bolne men jo hichkichati hai
vo yaqinan paḌhi likhi hogi
varna kamre men shor kyon hota
us ki tasvir bolti hogi
dosto main chala ḳhuda-hafiz
mujh ko tanha.i DhunDhti hogi
varna dariya ne bahte rahna tha
us ne gagar nahin bhari hogi
main udasi ka giit huun ‘tabish’
vo mujhe gunguna rahi hogi
Leave a Reply