Agha Shayar Qazalbash
buton ke vaste to din-o-iman bech daale hain
ye vo mashuq hain jo ham ne kaabe se nikale hain
vo divana huun jis ne koh o sahra chhan daale hain
unhin talvon se to tuute hue kante nikale hain
tarashi hain vo baten us sitamgar ne sar-e-mahfil
kaleje se hazaron tiir chun chun kar nikale hain
jigar dil ke varaq hain vada-e-didar se raushan
unhen kyuun duun kisi ko ye to jannat ke qabale hain
agar munh se kaha kuchh to bikhar hi jaenge tukde
badi mushkil se ham tuute hue dil ko sambhale hain
hamin hain mojid-e-bab-e-fasahat hazrat-e-‘shair’
zamana sikhta hai ham se ham vo dilli vaale hain
Leave a Reply