ḳhushki pe rahungi kabhi paani men rahungi
ta umr isi naql-e-makani men rahungi
main jism nahin husn huun ai chashm-e-abad-tab
mar kar bhi mohabbat ki kahani men rahungi
tabinda rahenge miri ankhon ke kinare
ashkon men Dhali huun ki ravani men rahungi
ajdad ki qurbat se uThaya gaya mujh ko
goya main buzurgon ki nishani men rahungi
sheron hi pe mauquf nahin meri haqiqat
alfaz se bhagungi ma.ani men rahungi
ai sha.er-e-dil-soz mire dukh ko bayan kar
ta hashr tiri sho.ala-bayani men rahungi
ab guḌiya paTolon se ilaqa nahin ‘mahin’
bachpan se nikal aa.i javani men rahungi
Leave a Reply