Harim-E-Naz Ko Hum Ghair Ki Mahfil Nahin Kahte

Poet

harim-e-naz ko ham ghair ki mahfil nahin kahte

raqibon par magar vo kaun tha maa.il nahin kahte

jo rang-e-ishq se farigh ho us ko dil nahin kahte

jo maujon se na Takra.e use sahil nahin kahte

ishara sham.a ka samjha na parvana to kya samjha

manar-e-rah ko ahl-e-nazar manzil nahin kahte

ba-rang-e-rishta-e-tasbih dil se raah hai dil ko

bhaTak jaa.e jo is jaade se us ko dil nahin kahte

zuleḳha ke vaqar-e-ishq ko sahra se kya nisbat

jo ḳhud khinch kar na aa jaa.e use manzil nahin kahte

mariz-e-gham ki ghaflat bhi kamal-e-hoshiyari hai

jo gum ho jaa.e jalvon men use ghafil nahin kahte

bharam us ka hi ai mansur tu ne rakh liya hota

kisi ka raaz ai nadan sar-e-mahfil nahin kahte