taḳhir aa paḌi jo badan ke zuhur men
ham ne ḳhala.en ghol diin bainassutur men
miTTi ko apni raat men tahlil kar diya
ik sar-zamin sameT li taron ke nuur men
mumkin hai tark hi kare vo hashr ka ḳhayal
dil ka sukut phunk ke aaya huun suur men
ik nuqta-e-ghayab men Dhalne lage falak
bhaTka huun itni duur bhi tahtush-shu.ur men
tajrid-e-jan ki ik na.i mantiq huun main ‘riyaz’
poshida ho raha huun ḳhud apne huzur men
Leave a Reply