Zindagi Dekh Le Kuchh Der Tamasha Apna

zindagī dekh le kuchh der tamāshā apnā

TūTtā jaatā hai āvāz se rishta apnā

do-ghaḌī ko bhī kisī ne mujhe kāñdhā na diyā

umr-bhar Dhotā rahā ḳhud hī janāza apnā

nasb har shaḳhs nazar aatā hai chaurāhe par

aadmī bhuul gayā bhiiḌ meñ rasta apnā

kitnī sadiyoñ se huuñ anjān safar meñ ‘saifī’

aaj tak maiñ ne to ghar bhī nahīñ dekhā apnā

Leave a Comment