Etimad-E-Ishq Ko Kyon Raegan Samjha Tha Main

Shadan Indauri

e’timad-e-ishq ko kyon ra.egan samjha tha main

un ke jalve bhi vahin nikle jahan samjha tha main

ek pasandida giraftari thi azadi na thi

ek qafas tha vo bhi jis ko ashiyan samjha tha main

kis qadar ta.ane diye hain himmat-e-parvaz ne

sochta huun kyon qafas ko ashiyan samjha tha main

ai ma.az-allah mafhum-e-vafa ki vus.aten

zindagi ko muḳhtasar si dastan samjha tha main

kis qadar marghub tha dil ko muqaddar ka fareb

ek parda tha jahan sab kuchh nihan samjha tha main

bavajud-e-gumrahi allah-re josh-e-talash

manzilon ko bhi ghubar-e-karvan samjha tha main

kya ḳhabar ‘shadan’ ye gham bhi javedan hai ya nahin

aish ko bhi yuun hi kuchh din javedan samjha tha main