kis hunar ke muzahire men ho
tum to khud se muqable men ho
qatl karna to us ko thiik nahin
ishq ki maut hadse men ho
chand aaega sulh karne ko
jaag jaao mughalte men ho
naam main dusra mohabbat ka
tum ho pagal ya phir nashe men ho
aate aate hansi yuun phisli hai
jaise ashkon ke raste men ho
chand ghaeb hai chand raton se
kya pata mere aaine men ho
tum chale the khala ko bharne kyun?
laut aae ki raste men ho
kaun munsif bane siva dariya
ik jazira jo katghare men ho
Leave a Reply