ḳhirad ka lafz junun ki kitab men na likho
kisi ka jurm kisi ke hisab men na likho
qalam lahu men Dubo kar likho jo likhna hai
magar qalam ko Dubo kar sharab men na likho
javan nasl ghalat raa.e aḳhz kar legi
kahaniyon ko haqiqat ke baab men na likho
hamare sher kahan fikr-o-fan se tabinda
hamare sher abhi intiḳhab men na likho
tumhara gham gham-e-dauran gham-e-hayat ke ba.ad
ab aur gham dil-e-ḳhana-ḳharab men na likho
Leave a Reply