Nirmal Nadeem
gali men husn ki jo naqsh-e-pa chamakta hai
hamare ishq hi ka martaba chamakta hai
isi liye to mujhe niind hi nahin aati
tamam raat koi ḳhat khula chamakta hai
hazaron shaah jo jhukte hain samne us ke
kisi faqir ki jholi men kya chamakta hai
ka.i dinon se ye aalam hai dard ka dil men
kisi mazar pe jaise diya chamakta hai
main aankh muund ke hi us ko yaad karta huun
mujhe pata hai ki mera ḳhuda chamakta hai
kabhi jo ḳhvab men aati hai us ki parchha.i
hamari aankh men ik aa.ina chamakta hai
usi ka qafila paata hai manzilon ka pata
ghubar-e-rah men jo rahnuma chamakta hai
tamam sadiyon ne sincha hai apne ashkon se
usi ke nuur se daman mira chamakta hai
kashish ye kaisi hai lafzon men kis ka jalva hai
‘nadim’ aap ki ghazlon men kya chamakta hai
Leave a Reply