Saail Dehlvi
ḳhizan ka jo gulshan se paḌ jaa.e paala
to sehn-e-chaman men na gul ho na laala
liya tere ashiq ne barson sambhala
bahut kar gaya marne vaala kasala
pa.e-fateha haath uThavega koi
sar-e-turbat-e-bekasan aane vaala
isi girya ke taar se meri ankhen
bana dengi naddi baha dengi naala
biTha kar tumhen sham.a ke paas dekha
tum ankhon ki putli vo ghar ka ujala
ḳhat-e-shauq ko paḌh ke qasid se bole
ye hai kaun divana ḳhat likhne vaala
diya hukm saaqi ko pir-e-mughan ne
pai-e-muhtasib jam-o-mina uTha la
ye sunte hi mai-ḳhvar bole ḳhushi se
hamin sa hai ye nek allah vaala
haqiqat men ‘sa.il’ ne zauq-e-adab se
jahan tak uchhala gaya naam uchhala
Leave a Reply