Be-Sabab Kyon Ho Pareshan Kahan Jaoge

be-sabab kyoñ ho pareshān kahāñ jāoge

shab añdherī hai mirī jaan kahāñ jāoge

rang laa.eñ mire aañsū mire naale na kahīñ

bād-o-bārāñ kā hai imkān kahāñ jāoge

uf ye tūfān-e-tarannum ye jhanaktī paa.el

shab meñ is tarah bil-elān kahāñ jāoge

do qadam chalte ho aur chal ke Thahar jaate ho

aao jaanā nahīñ āsān kahāñ jāoge

ye javānī kā ubhār aur ye fitrat kā dabāo

le ke uThtā huā tūfān kahāñ jāoge

raat kā vaqt hai tanhā ho zamāna hai ḳharāb

apne uupar karo ehsān kahāñ jāoge

log uThte haiñ ibādat ke liye pichhle pahar

Dagmagā jā.eñge īmān kahāñ jāoge

raah meñ ganj-e-shahīdāñ se paḌegā paalā

hashr uThne kā hai imkān kahāñ jāoge

DhūñDhne nikle to ho dil kā sukūñ ai ‘fārūq’

saarī duniyā hai pareshān kahāñ jāoge

Leave a Comment