bhari raat men jagna paḌ gaya hai
tire baare men sochna paḌ gaya hai
kisi ḳhvab ki phir se dastak hai shayad
dar-e-dil mujhe kholna paḌ gaya hai
tiri soch bhi sochni paḌ ga.i hai
tira lahja bhi bolna paḌ gaya hai
dhuan ban ke sanson men chubhne lagi thi
ḳhamoshi ko ab toḌna paḌ gaya hai
jahan reza reza main bikhri paḌi thi
vo manzar mujhe joḌna paḌ gaya hai
ye kya sarsarahaT hui mere dil men
qalam rok kar sochna paḌ gaya hai
Leave a Reply