Aal E Ahmad Suroor
hamare haath men jab koi jaam aaya hai
to lab pe kitne hi pyason ka naam aaya hai
kahan ka nuur yahan raat ho gai gahri
mira charagh andheron ke kaam aaya hai
ye kya ghazab hai jo kal tak sitam-rasida the
sitamgaron men ab un ka bhi naam aaya hai
tamam umr kati us ki justuju karte
bade dinon men ye tarz-e-kalam aaya hai
badhun to raakh banun mud chalun to pathra jaun
safar men shauq ke nazuk maqam aaya hai
khabar bhi hai mire gulshan ke laala o gul ko
mira lahu bhi baharon ke kaam aaya hai
vo sar-phire jo nigah-dari-e-junun men rahe
‘surur’ un men hamara bhi naam aaya hai
Leave a Reply