chashm-e-mast-e-saqi se dil hua ḳharab-abad
mai-kada hai aur masti ab to harche bada-bad
mil-mila ke donon ne dil ko kar diya barbad
husn ne kiya be-ḳhud ishq ne kiya azad
mera TuTa-phuTa dil ban gaya vatan us ka
be-vatan tha avara ishq-e-ḳhanuma-barbad
masti-e-ana laila kar-e-ishq-e-majnun hai
kaif-e-vasl-e-shirin hai naqsh-e-tesha-e-farhad
jism-o-jan ka ilhaq vaj.h-e-ranj-o-rahat hai
band-e-shadi-o-gham se jan-e-pak hai azad
shauq aur tanaffur men raaz us ka pinhan hai
hai koi agar dil-gir hai agar koi dil-shad
ghaflat aur nadani vaj.h-e-shauq-o-nafrat hai
hai jo ain-e-irfan men be-sabat-o-be-buniyad
band-e-ranj-o-rahat se fikr-e-shauq-o-nafrat se
qaid-e-jehl-o-ghaflat se ḳhud-shanas hai azad
jalva us ka ai ‘sahir’ chashm-e-pak-bin se dekh
husn-e-la-yazli se shash-jahat hain abad
Leave a Reply