Poet
tujhe DhunDhti hain nazren mujhe ik jhalak dikha ja
miri zindagi ke malik miri zindagi men aa ja
na gharaz sanam-kade se na haram se koi matlab
mujhe vasta hai tujh se mire dil men tu sama ja
tu bichhaḌ gaya hai jab se miri niind uḌ ga.i hai
tiri raah tak raha huun mire chand ab to aa ja
mujhe dard de ke apna tu kahan chhupa hai ja kar
mira dil churane vaale mujhe shakl to dikha ja
tira dard ban gaya hai miri zindagi ka hasil
mire dil pe haath rakh de zara hausla baḌha ja
mujhe aa ke de sahara ye qadam na Dagmaga.en
kahin main bhaTak na ja.un mujhe rasta dikha ja
mire naam ki nishani na rahe jahan men baaqi
miri jaan lene vaale miri qabr bhi miTa ja
tire husn pe fida huun tire ishq men ‘fana’ huun
mujhe teri aarzu hai miri ḳhalvaton men aa ja
Leave a Reply