Shaista Mufti
jalta rahe charagh havaon pe bas nahin
hai ehtimam-e-sham koi ham-nafas nahin
raste pukarte hain hamen duur duur se
mahsur-e-zat hai koi dam-e-qafas nahin
vo mil raha hai ghair se itne ḳhulus se
shikva karen bhi kya ki vo ahl-e-havas nahin
jhilmil si yaad palkon pe Thahri rahi magar
dil tha jo be-qarar vo ab ke baras nahin
bahte hain mauj-e-ab pe sail-e-ravan ke saath
tham jaa.en raston pe vo ḳhashak-o-ḳhas nahin
bin tere aa ke Thahr gaya qafila kahan
sunte hain jal-tarang sada-e-jaras nahin
Leave a Reply