koi to ho is jahan men aisa
ki jis ke bas men ho saari duniya
ki sarhadon ki sabhi lakiren
jahan ke naqshe se ek pal men
kisi jatan se mita ke rakh de
ye ahani khar-dar taren
zamin ke saath dil ke rishte bhi bantti hain
kai dilon men tavil arse se chubh rahi hain
koi to un ko ukhad phenke
koi to ho jo tamam duniya
ko ek khitte ki shakl de de
agar koi moajiza dikha de
to saare insan jab bhi chahen
phir apne pyaron se mil sakenge
baghair visa ki bandishon ke
sahulaton se masarraton se
phir is ke badle agar vo mujh se
miri mata-e-hayat mange
to ek pal ko bhi main na sochun
khushi khushi us ko daan kar duun
Leave a Reply