ruup sunahra aankh kanval hai kya likkhun
us ki ik-ik baat ghazal hai kya likkhun
main ki dukh ke sahraon men pyasa huun
vo ki sukh ka ganga-jal hai kya likkhun
main ki har ik moḌ na.e dorahe par
vo ki har uljhan ka hal hai kya likkhun
soch raha tha likh duun dil ki baat use
phir socha dil to pagal hai kya likkhun
jis ko dekh ke vaqt ki nabzen ruk jaa.en
us ki aankh men vo kajal hai kya likkhun
shahr tire se nikla huun main kuchh aise
ankhen nam hain aur daldal hai kya likkhun
main baiTha tha likhne apne gham us ko
ashkon se kaghaz jal-thal hai kya likkhun
rup-nagar men nuur sa jhilmil vo chehra
sundar shital aur komal hai kya likkhun
chand sitare us ko dekh ke jalte hain
vo jagmag sa shish-mahal hai kya likkhun
us ke lams ko baagh ka baagh tarasta hai
vo shadab hai ya maḳhmal hai kya likkhun
us ne qatl kiya par kaun gavahi de
saari duniya us ke val hai kya likkhun
ek ‘mubarak’ vo na dil se duur rahe
baaqi to phir chal so chal hai kya likkhun
Leave a Reply