laila sar-ba-gareban hai majnun sa ashiq-e-zar kahan
hiir duhai deti hai ranjhe sa yar-e-ghar kahan
apna khun-e-jigar piite hain tujh ko duaen dete hain
tere maikhane men saaqi ham sa bada-khvar kahan
hijr ka zulm hamari qismat vasl ki daulat ghair ka maal
zakhm kise aur marham kis ko dard kahan hai qarar kahan
hijr ka zulm hamari qismat vasl ki daulat ghair ka maal
zakhm kise aur marham kis ko dard kahan hai qarar kahan
pir-e-mughan kya kam tha mohtasibon ka bhi ab dakhl hua
miina par kya guzregi sar phodenge mai-khvar kahan
sunte hain ki chaman mahke bulbul chahke ban lahke hain
apne nasheman tak jo na pahunchi aisi bahar bahar kahan
kunj-e-mehan hai dar-o-rasan hai zulmat hai tanhai hai
kaun si ja hai ham-safaro le aai talash-e-yar kahan
gul-chinon ko aaj chaman-bandi ka daava hai ‘parvez’
ab dekhen lut kar bikta hai kali kali ka singhar kahan
Leave a Reply