ameer-minai

Jab Se Bandha Hai Tasawwur Us Rukh-E-Pur-Nur Ka

jab se bandha hai tasavvur us rukh-e-pur-nur ka

saare ghar men nuur phaila hai charagh-e-tur ka

bakht-e-vazhun se jale kyuun dil na mujh mahrur ka

marham-e-kafur se munh aa gaya nasur ka

is qadar mushtaq huun zahid khuda ke nuur ka

but bhi banvaya kabhi main ne to sang-e-tur ka

tujh ko laae ghar men jannat ko jalaya rashk se

ham-baghal tujh se hue pahlu dabaya huur ka

gor-e-kafir kis liye hai tira-o-tar is qadar

pad gaya saaya magar meri shab-e-dijur ka

husn-e-yusuf aur tere husn men itna hai farq

chot ye nazdik ki hai vaar tha vo daur ka

qasr-e-tan bigda kisi ka gorkan ki ban padi

ghar kisi ka gir pada ghar bin gaya mazdur ka

chehra-e-janan se sharma kar chhupaya khuld men

khama-e-taqdir ne khincha jo naqsha huur ka

hajat-e-mushshata kya rukhsar-e-raushan ke liye

dekh lo gul katta hai kaun sham-e-tur ka

zulf-o-ru-e-yar se nairang-e-qudrat hai ayaan

mahr ke panje men hai daman shab-e-dijur ka

khaksari kar jo ho manzur ankhon men jagah

khaak ho kar surma bin jaata hai patthar taur ka

ghafilon ke kaan kab khulte hain san kar shor-e-hashr

sone valon ko jaga sakta nahin ghul duur ka

puchh lena sab vatan ka haal ai ahl-e-adam

baith lene do zara aata huun uttha daur ka

ijz karte hain adu-e-jan se bhi khasan-e-haq

jhuk gaya sar aage pa-e-dar par mansur ka

maut kya aai tap-e-furqat se sehat ho gai

dam nikalne se badan thanDa hua ranjur ka

jaate hain mai-khana-e-alam se ham su-e-adam

kah do az-khud-raftagi se hai irada duur ka

muziyon ko hadson se dahr ke kya khauf hai

barish-e-baran se ghar girta nahin zambur ka

chashm-e-saghar be-sabab har dam lahu roti nahin

mughbachon se saqiya dil phat gaya angur ka

jaate hain mai-khana-e-alam se ham su-e-adam

kah do az-khud-raftagi se hai irada duur ka

ki nazar jis par kudurat se raha khamosh vo

hai asar gard-e-nigah-e-yar men sindur ka

jalva-e-mashuq har ja hai basirat ho agar

kirmak-e-shab-tab men aalam hai sham-e-tur ka

mar ke yaran-e-adam ke paas pahunchunga ‘amir’

chalte chalte jaan jaegi safar hai duur ka

More Poems

Leave a Comment