kar bhi luun agar khvab ki taabir koi aur
siine men utar jaegi shamshir koi aur
ab ashk tire rok nahin paenge mujh ko
ab daal mire paanv men zanjir koi aur
main shab se nahin din ki halakat se dara huun
ab mere liye bhejna tanvir koi aur
ab teri mohabbat se bhi kuchh kaam na hoga
ab dhund mare vaste iksir koi aur
ai mere musavvir nahin ye main to nahin huun
ye tu ne bana daali hai tasvir koi aur
is baar mujhe ishq ka azar nahin hai
is baar mohabbat men hai dil-gir koi aur
Leave a Reply