mire kalam men pechida isti.ara nahin
ki harf-e-sidq chhupana mujhe gavara nahin
mire liye yahi maujen hain daman-e-iliyas
bhanvar men huun mire donon taraf kinara nahin
dua.en mangta huun sub.h ke ujalon ki
andheri vasl ki shab bhi mujhe gavara nahin
tire mizaj ke resham men kaise aag lagi
miri ghazal ka ḳhunuk lafz to sharara nahin
dil-o-dimagh ko kya dega raushni vo ‘hazin’
na.i hayat ka jo lafz goshvara nahin
Leave a Reply