Ameer Qazalbash
zaban hai magar be-zabanon men hai
nasihat koi us ke kanon men hai
chalo sahilon ki taraf ruḳh karen
abhi to hava badbanon men hai
zamin par ho apni hifazat karo
ḳhuda to miyan asmanon men hai
na jaane ye ehsas kyuun hai mujhe
vo ab tak mire pasbanon men hai
saja to liye ham ne divar-o-dar
udasi abhi tak makanon men hai
hava ruḳh badalti rahe bhi to kya
parinda to apni uḌanon men hai
Leave a Reply