Maratib Akhtar
jaag uThin chinghaḌti maujen safina chahiye
chaar janib maut hai himmat se jiina chahiye
mez par ik filon ka Dher zehni karb ḳhauf
aadmi se kaam lene ka qarina chahiye
aag barsa.i idhar insan par insan ne
aur harifon ko udhar sahra-e-sina chahiye
is bhare bazar is baghdad se guzra huun main
main yahan bhuka huun mujh ko bhi dafina chahiye
dushmanon ko hi na kiije qatl is talvar se
doston ke vaste bhi dil men kiina chahiye
Leave a Reply