ḳhushiyan thiin bevafa na rahin zindagi ke saath
gham ba-vafa the chalte rahe aadmi ke saath
Dhalne lagi javani jo aa.i thi chaar din
Thahra buḌhapa qabr talak rahbari ke saath
andaz zindagi ke badal kar jiyo sada
apnon ki be-ruḳhi ko saho tum ḳhushi ke saath
puuja hai main ne roz-o-shab is qadar use
us ka hi naam likhti rahi sha.eri ke saath
mujh ko ‘saba’ mili hai masarrat bhi is tarah
jaise ki ajnabi ho kisi ajnabi ke saath
Leave a Reply