ghubar hoti sadi ke sahraon se ubharte hue zamane
nae zamanon men aae tujh ko talash karte hue zamane
udaas shamon ki sard raton men tere ushshaq dekhte hain
palak jhapakte hue darichon men sub.h karte hue zamane
agar ye sab karobar-e-hasti tiri tavajjoh se hat gaya hai
to phir ye kis ne sambhal rakkhe hain sab bikharte hue zamane
bisat-e-imkan par taghayyur ka husn mohre badal raha hai
charagh-e-hairat ki lau men zinda hain raqs karte hue zamane
zamin suraj ke gird apne madar men ghumti hai jaise
tiri gali ka tavaf karte hain yuun guzarte hue zamane