Tajdar Adil
vo jo ḳhvabon ke ghar ka rasta hai
ḳhvahish-e-dar-ba-dar ka rasta hai
us ki yadon ki rahguzar thi jahan
ab vo shahr-e-hunar ka rasta hai
us se milne ki ḳhvahishon ke liye
ek tanha safar ka rasta hai
ek lamhe ko us ki manzil hai
aur phir umr-bhar ka rasta hai
ishq asan safar hai kis ke liye
ye miri jaan sar ka rasta hai
jo mire hijr ki masafat hai
vo tiri ik nazar ka rasta hai
ishq ki raah mat chalo ‘adil’
ye to us ke hi dar ka rasta hai
Leave a Reply