Khwaja Shauq
lala-o-gul ka lahu laakh bahaya jaa.e
ye chaman chhoḌ ke ham se to na jaaya jaa.e
phir rahe hain sabhi chehron pe naqaben Daale
kis ko halat ka a.ina dikhaya jaa.e
rang par jashn-e-baharan jabhi aa sakta hai
phuul kanTon men koi farq na paaya jaa.e
apni tahzib hi iḳhlas-o-ravadari hai
is ko ha.Tne se ba-har-hal bachaya jaa.e
sab barabar ke hain haqdar chaman-sazi men
phir kise harf-e-ghalat kah ke miTaya jaa.e
ḳhud-baḳhud qaum ki taqdir sanvar ja.egi
pahle bigḌa hua mahaul banaya jaa.e
ji rahe hain sabhi ehsas kuchal kar apna
ab kise dard ka ehsas dilaya jaa.e
sirf ham uTh ga.e uupar to koi shaan nahin
shaan to ye hai ki girton ko uThaya jaa.e
ḳhuun basta hai tamannaon ka ankhen kya hain
kaun sa ḳhvab nigahon men basaya jaa.e
adamiyat ke charaghon ki laven tez karo
na ho aisa ki badan chhoḌ ke saaya jaa.e
manzilen aisi bhi hain fikr-e-bashar se aage
jin ki had men na ishara na kinaya jaa.e
‘shauq’ dil naam to hai ek chaman zaḳhmon ka
silsila is ka magar kis se milaya jaa.e
Leave a Reply