main ḳhamushi ke jazire men ek patthar tha
magar sadaon ka rela mira muqaddar tha
na jaane kaun tha kis ajnabi safar par tha
vo qafile se alag qafile ke andar tha
tamam shahr ko us ka pata mila mujh se
vo aa.ine men tha par aa.ine se bahar tha
vo ja raha tha samundar ko jhelne ke liye
araq araq sar-e-sahil tamam manzar tha
khula tha us ke liye qasr ka junubi dar
magar vahan koi andar hi tha na bahar tha
vo narm ret ke bistar pe ja ke leT gaya
khuli jo aankh to charon taraf samundar tha
ghira hua tha vo bad-namiyon ke haale men
hasin kuchh aur bhi ‘shahin’ us ka paikar tha
Leave a Reply